Черкесск къалэм щекIуэкIащ «Баталпашинские чтения — 2024» V урысейпсо щIэныгъэ-практикэ конференцэр.
Япэ дунейпсо зауэр илъэси 110-рэ зэрырикъум теухуа зэхыхьэр къызэрагъэпэщащ Пятигорск епархиемрэ Алиев Умар и цIэр зезыхьэ Къэрэшей-Шэрджэс къэрал университетымрэ.
Къеджэныгъэхэм хэтащ Белоруссием, Армением, Чехием, Урысейм и къалэ 12-м я щIэныгъэлIхэр, лъахэхутэхэр, Черкесск къалэм и члисэхэм екIуалIэхэр, КъШР-мрэ Старополь краймрэ я егъэджэныгъэ IуэхущIапIэ 13-м я студентхэр.
Пленарнэ зэIущIэр щызэхэтащ щэнхабзэмрэ гъуазджэмкIэ Даур Аслъэн и цIэр зезыхьэ Къэрэшей-Шэрджэс къэрал колледжым и конференц-залым. ЗэIущIэхэр щызэхэтащ Никольскэ соборым и конференц-пэшхэмрэ ПечатымкIэ унэмрэ.
ЗэIущIэр ирагъэкIуэкIащ тхыдэ щIэныгъэхэм я доктор Ратушняк Олег, Пятигорск епархием и Ищхъэрэ Къэрэшей-Шэрджэс округым и благочиннэ, психологие щIэныгъэхэм я кандидат щоджэн нэхъыжь Нартов Алескандр, тхыдэ щIэныгъэхэм я кандидатхэу – Кратовхэ Евгенийрэ Натальерэ. Шафрановэ Ольгэ, Дворцовэ Татьянэ, тхыдэмкIэ магистр щоджэн Гурин Александр. Доклад ящIащ Пятигорск, Ставрополь, Армавир епархиехэм я лIыкIуэхэм.
Зэхыхьэм хэтхэм фIэхъускIэ зыхуагъэзащ КъШР-м ЕгъэджэныгъэмкIэ и министр Кравченкэ Иннэ, КъШР-м лъэпкъ Iуэхухэмрэ цIыхубэ коммуникацэхэмкIэ и министр Есенеев Мурат, «Русь» жылагъуэ зэгухьэныгъэм Къэрэшей-Шэрджэсым щиIэ къудамэм и унафэщI Ганшин Алексей, гуманитарнэ къэхутэныгъэхэмкIэ Къэрэшей-Шэрджэс институтым и унафэщI Шакъ Ахьмэд, КъШР-м ис муслъымэнхэм я дин IуэхущIапIэм и муфтийм и дэIэпыкъуэгъу Семэн Динислам, КъШР-м и къэрал университетым филологиемкIэ и институтым урысыбзэмкIэ и кафедрэм и доцент Козловэ Людмилэ.
Зэхыхьэм хэтхэр щыIащ Къэрэшей-Шэрджэсым и щIыпIэ дахэхэм. Докладхэмрэ къэпсэлъэныгъэхэмрэ тхылъ щхьэхуэу къыдагъэкIыжынущ. Зэхыхьэм теухуа тхыгъэхэр «День республики» газетым къытрадзэжащ.