Зеленчукскэ станицэм и Петропавловскэ члисэм щагъэлъэпIащ «Лествица» тхьэмахуэ школыр илъэс 20 зэрырикъур. Школ гупитIым щыщ еджакIуэ 70 я адэ-анэхэмрэ члисэм и щоджэнхэмрэ я гъусэу махуэшхуэм щызэхуэсащ.
Тхьэмахуэ къэс сабийхэр ХъыбарыфIхэр зэрыт тхылъ лъапIэм, члисэбзэм, тхьэлъэIухэм, члисэ уэрэдхэм йоджэ, сурэт ящI. НыбжьыщIэхэм концертхэр ягъэхьэзыр члисэ махуэшхуэхэм ирихьэлIэу.
ЕджакIуэхэм зыкъагъэлъэгъуащ школым и юбилейм ирихьэлIэу. ЕгъэджакIуэхэм фIыщIэ тхылъхэр иратащ, школ унафэщI Оганезовэ Валентинэ члисэм и унафэщI щоджэн нэхъыжь Субтельный Евгений Пятигорск, Черкесск щIыналъхэм я архиепископ Феофилакт архиерей щIыхь тхылъыр иритащ.