2024 гъэм щэкIуэгъуэм и 28-м Москва КъегъэлакIуэ Христос и цIэр зезыхьэ кафедральнэ соборнэ члисэм члисэхэм я собор залым дунейпсо урыс цIыхубэ соборхэм я Iэтащхьэ, Москварэ Урысей псомрэ я Патриарх Кирилл щригъэкIуэкIащ «Русский мир: внешние и внутренние вызовы» XXVI Дунейпсо урыс цIыхуэ соборым и пленарнэ зэIущIэр.
Соборым и лэжьыгъэм хэтащ Урыс Чристэн Члисэм и иерарххэр, щоджэнхэр, монаххэр, къэрал властым и лIыкIуэхэр, ФедерацэмкIэ Советым хэтхэр, УФ-м и Федеральнэ Зэхуэсым и Къэрал Думэм и депутатхэр, ВРНС-м и Президиумым и Бюром хэтхэр, дин, щIэныгъэм, егъэджэныгъэм, щэнхабзэм я лэжьакIуэхэр, жылагъуэм щыщхэр.
ВРНС-м Къэбэрдей-Балъкъэр, Къэрэшей-Шэрджэс республикэхэм щиIэ къудамэхэм я лIыкIуэхэм я пашэу щытащ Пятигорск, Черкесск щIыналъэхэм я архиепископ Феофилакт. Абы яхэтащ КъШР-м и ЦIыхубэ зэхуэсым и УнафэщI Иванов Алескандр, КъШР-м и Жылагъуэ Палатэм и УнафэщI Ляшовэ Еленэ, КъБР-м и унафэщIхэмрэ епархием и щоджэнхэмрэ.
ЗэIущIэр къатащ «Союз», «Спас» телеканалхэмкIэ, Урыс Чристэн Члисэм и Патриархие порталымкIэ. Москварэ Урысей псомрэ я Патриарх Кирилл XXVI Урысейпсо урыс цIыхубэ соборыр зэIухауэ къилъытащ, Урысей Федерацэм и гимныр къеуащ. Урыс Чристэн Члисэм и унафэщIым доклад игъэхьэзыращ. Доклад нэужьым къэралым и унафэщIым и тхыгъэм къеджащ, Урысей Федерацэм и унафэщIхэр, политикэ партхэм, еджапIэ нэхъыщхьэхэм я лIыкIуэхэр, жылагъуэ зэгухьэныгъэхэм щыщхэр къэпсэлъащ. ВРНС-м и Iэтащхьэм и къуэдзэхэм доклад ящIащ.
ВРНС-м и Iэтащхьэм и къуэдзэ Щипков Александр зэIущIэм хэтхэм яригъэлъэгъуащ Патриарх Кирилл и Iэдакъэ къыщIэкIа «Настоящее и будущее Русского мира» тхылъыщIэр. Абы хагъэхьащ Дунейпсо урыс цIыхубэ соборым и соборнэ съездхэм щищIа докладхэр. ВРНС-м и унафэщIым и къуэдзэ митрополит Воскресенский Григорий Дунейпсо урыс цIыхубэ соборым и Соборнэ псалъэм и проектыр утыку кърихьащ. Соборым хэтахэр абы арэзы техъуащ.
ЗэIущIэр щиухым Патриарх Кирилл зэхыхьэм хэтхэм захуигъэзащ кIэух псалъэкIэ икIи Соборыр зэрызэхуащIыжыр жиIащ. Зэхыхьэ нэужьым Валаамскэ ставропигиальнэ къулъшырыфым и цIыхухъу хорым концерт итащ.
***
ВРНС-м и къудамэу КъБР-мрэ КъШР-мрэ щыIэхэр 2023 гъэ лъандэрэ щыIэщ икIи властым и унафэщIхэр, щоджэнхэр, жылагъуэр зэкъуегъэувэ. Республикэм и Жылагъуэ палатэхэм ядэлажьэу, къудамэр цIыхубэр зыгъэгузавэ Iуэхухэм я утыку хъуащ.