ЩIышылэм и 6-м пщыхьэщхьэм, махуэшхуэм и пэ къихуэу, Пятигорск, Черкесск щIыналъэхэм я архиепископ Феофилакт Пятигорск къалэм и Спасскэ кафедральнэ соборым щоджэнхэм я гъусэу тхьэлъэIур иригъэкIуэкIащ. Пастыр нэхъыщхьэм и гъусэу Тхьэ елъэIуащ къалэдэсхэмрэ КИФЩI-м и къалащхьэм и хьэщIэхэмрэ.
ЩIышылэм и 7-м, махуэшхуэм, архиепископ Феофилакт тхьэлъэIу литургиер щригъэкIуэкIащ Прохладнэ къалэм и Никольскэ члисэм. Члисэм и куэбжэм деж Щихънагъым къыщыIущIащ Тэрч къэзакъыдзэм и Тэрч-Малкэ округым и къэзакъхэр. Щоджэн нэхъыщхьэм къулыкъур драгъэкIуэкIащ Пятигорск епархием Налшык щиIэ округым и благочиннэ щоджэн нэхъыжь Бобылев Валентин, члисэм и щоджэнхэм унафэщI щоджэн нэхъыжь Маршалкин Андрейрэ къардэн нэхъыжь Кубэ Димитрийрэ я пашэу. Литургие нэужьым Щихънагъым махуэшхуэр игъэлъэпIащ икIи фIэщхъуныгъэ зиIэхэм узэщIыныгъэкIэ захуигъэзащ. КъБР-м и Iэтащхьэм и хъуэхъум къеджащ лъэпкъ Iуэхухэмрэ жылагъуэ проектхэмкIэ министр КIурашын Анзор.
А махуэм и пщыхьэщхьэм Пастыр нэхъыщхьэм пщыхьэщхьэ тхьэлъэIур щригъэкIуэкIащ Спасскэ кафедральнэ соборым. Щихънагъым къулыкъур драгъэкIуэкIащ Пятигорск и члисэхэм я щоджэнхэм епархием и Административнэ секретариатым и щоджэн Яковенкэ Илия я пашэу. ТхьэлъэIу нэужьым Щихънагъым фIэщхъуныгъэ зиIэхэм хъуэхъукIэ захуигъэзащ, IэфIыкIэхэр яритащ.