2025 гъэм мэкъуауэгъуэм и 28-м Кисловодск къалэм и Никольскэ члисэм аттестатхэмрэ медалхэмрэ щратыжащ Чристэн Свято-Никольскэ классическэ гимназием и 11-нэ классыр къэзыуххэм.
ФIыщIэ тхьэлъэIур иригъэкIуэкIащ IуэхущIапIэр къызэIузыха, Пятигорск, Черкесск щIыналъэхэм я архиепископ Феофилакт. Щоджэн нэхъыщхьэм къулыкъур драгъэкIуэкIащ соборым и унафэщI, гимназием и унафэщI щоджэн нэхъыжь Знаменский Иоаннрэ щоджэнхэмрэ, гимназием и егъэджакIуэхэм. ЕджапIэр къэзыуххэм я гъусэу Тхьэ елъэIуащ адэ-анэхэмрэ егъэджакIуэхэмрэ.
ЕджапIэр къэзыуххэм ехъуэхъуну зэхуэсащ Кисловодск къалэ администрацэм и Iэтащхьэ Моисеев Евгений, къалэ думэм и унафэщI Волошинэ Любовь, гимназием и Попечительскэ советым хэт, Ставрополь крайм и Думэм социальнэ политикэмрэ узыншагъэр хъумэнымкIэ и комитетым и унафэщIым и къуэдзэ Мурашкэ Николай.
ТхьэлъэIу нэужьым Щихънагъ Феофилакт фIыщIэ яхуищIащ адэ-анэхэм я сабийхэм ирата гъэсэныгъэмрэ щIэныгъэмрэ папщIэ, къалэм и унафэщIым къалэм и зыужьыныгъэм хэлъхьэныгъэ зэрыхуищIым папщIэ абы и теплъэр зэрефIакIуэр къилъытэри. А махуэм игъэгуфIэу еджапIэр къэзыуххэм я гъусэу Щихънагъыр Тхьэ яхуелъэIуащ икIи къыхигъэщащ балигъыпIэ иува ныбжьыщIэхэм я фIэщхъуныгъэмрэ щIэныгъэмрэ я щIэгъэкъуэну яIэну я зэфIэкIхэм зэрыригушхуэнур.
Щихънагъ Феофилакт гимназием и гъэсэнхэм аттестатхэмрэ медалхэмрэ яритыжащ. ЕджапIэр къэзыух цIыхуибгъум щыщу тхум Урысей Федерацэмрэ Ставрополь краймрэ я дыщэ, дыжьын медалхэр иратащ. Щихънагъым къыбгъэдэкIыу ХъыбарыфIхэр зэрыт тхылъ лъапIэмрэ сыхьэтрэ тыгъэ яхуищIащ.
Гимназием и унафэщI щоджэн нэхъыжь Знаменский Иоанн Пастыр нэхъыщхьэм фIыщIэ хуищIащ гимназием и гъэсэнхэм гулъытэ зэрахуищIам папщIэ.
МедалкIэ еджапIэр къэзыуххэу Писоцкий Александррэ Землянская Серафимэрэ я ныбжьэгъухэм къабгъэдэкIыу фIыщIэ псалъэхэр жаIащ. Щоджэн нэхъыщхьэм фIыщIэ хуащIащ и псалъэ Iущхэмрэ лъагъуныгъэмрэ папщIэ.
Пастыр нэхъыщхьэм еджапIэр къэзыуххэм, адэ-анэхэм, егъэджакIуэхэм я гъусэу пищащ зэпсэлъэныгъэм. Махуэшхуэр щиухым Щихънагъыр ныбжьыщIэхэм ехъуэхъуащ гуфIэгъуэ, ехъулIэныгъэ яIэну.