2025 гъэм бадзэуэгъуэм и 11-м пщыхьэщхьэм, апостолхэу Петррэ Павелрэ я махуэшхуэм, Пятигорск, Черкесск щIыналъэхэм я архиепископ Феофилакт ЕссэнтIыгу къалэм и Петропавловскэ члисэм тхьэлъэIу щригъэкIуэкIащ. Щоджэн нэхъыщхьэм къулыкъур драгъэкIуэкIащ Пятигорск епархием и Административнэ секретариатым и унафэщI щоджэн Яковенкэ Илиярэ ЕссэнтIыгу члисэ округым и щоджэнхэм благочиннэ щоджэн нэхъыжь Фещенкэ Стефанрэ я пашэу. Къардэн къулыкъур иригъэкIуэкIащ къардэн нэхъыжь Кубэ Димитрий. Пастыр нэхъыщхьэм и гъусэу Тхьэ елъэIуащ къалэдэсхэмрэ зыгъэпсэхупIэм и хьэщIэхэмрэ. ТхьэлъэIум и пэ къихуэу архиепископ Феофилакт апостол пэлъытэ Ольгэ и цIэкIэ ягъэува орденым и III нагъыщэр иритащ Воробьевэ Любовь, иеросхимонах Стефан (Игнатенкэ) и фэеплъыр зэримыгъэкIуэдыжым папщIэ. ХъыбарыфIхэр зэрыт тхылъ лъапIэм къыщыхьахэм къеджа нэужь, Щихънагъым щоджэнхэмрэ екIуэлIапIэм кIуэхэмрэ хъуэхъукIэ захуигъэзащ. ТхьэлъэIу нэужьым махуэшхуэм концерткIэ пащащ икIи зыкъагъэлъэгъуащ.
Бадзэуэгъуэм и 12-м, махуэшхуэм, архиепископ Феофилакт тхьэлъэIу литургие щригъэкIуэкIащ Зеленчукскэ станицэм и Петропавловскэ члисэм. Щоджэн нэхъыщхьэм къулыкъур драгъэкIуэкIащ Пятигорск епархием Ипщэ Къэрэшей-Шэрджэс округым и щоджэнхэм благочиннэ щоджэн нэхъыжь Субтельный Евгений я пашэу. Къардэн къулыкъур иригъэкIуэкIащ къардэн нэхъыжь Кубэ Димитрий. Литургие нэужьым Щихънагъым зэгъусэ тхьэлъэIур иригъэкIуэкIащ, апостолхэр игъэлъэпIащ, фIэщхъуныгъэ зиIэхэм узэщIыныгъэ яIэну захуигъэзащ. ТхьэлъэIу нэужьым Пастыр нэхъыщхьэр Тхьэ елъэIуащ щоджэнхэм я псэр зэгъэну, члисэм пэгъунэгъуу щIалъхьэжахэм.