2025 гъэм бадзэуэгъуэм и 27-м Пятигорск, Черкесск щIыналъэхэм я архиепископ Феофилакт ЕссэнтIыгу къалэм и Cевернэ хьэблэм и Троицкэ члисэр игъэнэхуащ икIи тхьэлъэIу литургиер щригъэкIуэкIащ. Щоджэн нэхъыщхьэм къулыкъур драгъэкIуэкIащ Пятигорск епархием ЕссэнтIыгу щиIэ округым и щоджэнхэм щоджэн нэхъыжь Фещенкэ Стефанрэ къардэн нэхъыжь Кубэ Димитрийрэ я пашэу. ХъыбарыфIхэр зэрыт тхылъ лъапIэм къыщыхьахэм къеджа нэужь, фIэщхъуныгъэ зиIэхэм узэщIыныгъэкIэ захуигъэзащ.
ТхьэлъэIу нэужьым архиепископ Феофилакт дамыгъэ лъапIэхэр яритащ члисэм и ухуакIуэхэмрэ абы зи нэIэ тетхэмрэ. Кэссиди Владимир иратащ члисэ ухуэныгъэмкIэ Патриаршэм и дамыгъэр, Кесов Лазарь – фIэщхъуныгъэ зиIэ джыназ, щихъ Московский Даниил и орденым и ещанэ нагъыщэр, Делибалтовэ Афинэ – апостол пэлъытэ пащтыхь гуащэ Ольгэ и орденым и ещанэ нагъыщэр. «Пятигорск епархиер егъэфIэкIуэным хуищIа хэлъхьэныгъэхэр» медалыр, архиерей щIыхь тхылъхэр ятащ.