2025 гъэм бадзэуэгъуэм и 26-м Кисловодск щагъэлъэпIащ Кавказ Ищхъэрэм и къэрал филармониер къызэрызэIуахрэ илъэси 130-рэ зэрырикъур. Ар зыухуар дирижёр цIэрыIуэ, пианист, егъэджакIуэ, жылагъуэ лэжьакIуэ Сафонов Василийщ.
Никольскэ соборым и некрополым музыкант цIэрыIуэмрэ и Iыхьлыхэмрэ щыщIалъхьэжам деж, члисэм и унафэщI щоджэн нэхъыжь Знаменский Иоанн тхьэлъэIу щригъэкIуэкIащ. Василий и псэр зэгъэн папщIэ Тхьэ елъэIуну зэхуэсащ зэхыхьэм хэтахэр: Америкэм и Штат Зэгуэтхэм къикIа Сафоновхэ Василийрэ Мариерэ, филамонием и унафэщI Бережная Светланэ, къалэ-зыгъэпсэхупIэм щыпсэухэмрэ абы и хьэщIэхэмрэ.
ТхьэлъэIум хэтхэм защыхуигъазэм, щоджэн нэхъыжь Иоанн ягу къигъэкIыжащ урыс музыкант цIэрыIуэм псапэ ищIэу зэрыщытар, Кисловодск станицэм и Крестовоздвиженскэ члисэм ухуэныгъэмкIэ и Попечительскэ советым хэтам, Никольскэ соборыр зыухуахэм яхэта и адэр. Щоджэным къыхигъэщащ а щIыпIэ лъапIэм Василий теухуа тхьэлъэIур зэрыщызэпамыгъэур, и гъащIэ псор Урысейм зэрытриухуар.
ТхьэлъэIу нэужьым абы хэтахэр члисэм Тхьэ щелъэIуащ, Иоанн щихъ Николай и тхьэнапэхэр щаритащ, итIанэ яунэтIащ «Святыни земли родной» члисэ-тхыдэ музейм.