2025 гъэм фокIадэм и 20-м Черкесск къалэм и Покров члисэм Пятигорск, Черкесск щIыналъэхэм я архиепископ Феофилакт республикэм и къалащхьэм и Iэтащхьэ Баскаев Алексей щритащ щихъ, джыназ Московский Даниил и орденым и III нагъыщэр. Алексей хуагъэфэща Урыс Чристэн Члисэм и дамыгъэхэм къадэкIуэу, Черкесск и пасэрей члисэм пэгъунэгъу Покров паркыр зэрызэригъэпэщыжари ящыщщ. Пастыр нэхъыщхьэмрэ къалэм и мэрымрэ зыщаплъыхьащ къагъэщIэрэщIэжа паркым.
Архиепископ Феофилакт иригъэкIуэкIащ Черкесск къалэм и Свято-Сергиевскэ гимназием и педсоветым и зэIущIэ зыубгъуар. Советым и лэжьыгъэм хэтащ егъэджэныгъэмкIэ Центр №11-м и унафэщI Ляшовэ Еленэ, гимназием и щоджэн нэхъыжь Кузнецов Сергий, щоджэнхэр, гимназием щезыгъаджэхэр, егъэджакIуэхэр, кураторхэр.
А махуэ дыдэм щоджэн нэхъыщхьэм фIэхъус ярихащ Баталпашинскэ къеджэныгъэхэм хэтхэр. «Баталпашинские чтения — 2025» VI лъэпкъыбэ щIэныгъэ-практикэ конференцэр траухуащ Москварэ Урысей псомрэ я патриарх лъапIэ Тихон дунейм зэрехыжрэ илъэси 100, Хэку зауэшхуэм ТекIуэныгъэ Иныр къызэрыщахьрэ илъэс 80, Черкесск къалэр илъэси 100 зэрырикъум. Зэхуэсыр къызэрагъэпэщащ Пятигорск епархиемрэ Алиев Умар и цIэр зезыхьэ Къэрэшей-Шэрджэс къэрал университетымрэ.
Къеджэныгъэхэм и лэжьыгъэм хэтащ Санкт-Петербург, Дагъыстэн, Къэрэшей-Шэрджэс, Адыгэ республикэхэм, Краснодар, Ставрополь крайхэм я щIэныгъэлIхэмрэ лъахэхутэхэмрэ, студентхэр. Пленарнэ, секцэ зэIущIэхэр щекIуэкIащ Черкесск къалэм ЕгъэджэныгъэмкIэ и центрым.
Щихънагъ нэужьым зэхуэсым хэтахэм фIэхъус ирахащ Къэрэшей-Шэрджэсым Абу-Хьэнифэ и цIэр зезыхьэ и муслъымэн институтым и ректор Каитов Ахъмэт, КъШР-м и Жылагъуэ палатэм и унафэщI, Черкесск къалэм егъэджэныгъэмкIэ и центр №11-м и унафэщI Ляшовэ Еленэ, КъШР-м егъэджэныгъэмрэ щIэныгъэмкIэ и министрым и къуэдзэ Атаевэ лейлэ, КъШР-м лъэпкъ IуэхухэмкIэ, цIыхубэ коммуникацэхэмрэ печатымкIэ и министрым и къуэдзэ Гузко Сергей.
2025 гъэм и къеджэныгъэхэм я щхьэхуэныгъэ хъуащ студентхэм я секцэ къызэрызэрагъэпэщар. РИНЦ-м и сборник къыдагъэкIынущ абы щащIа докладхэмрэ къэпсэлъэныгъэхэмрэ щызэхуэхьэсауэ.