ФокIадэм и 26-м, Воздвижения махуэшхуэм и пэ къихуэу, Пятигорск, Черкесск щIыналъэхэм я архиепископ Феофилакт тхьэлъэIу щригъэкIуэкIащ Пятигорск къалэм и Спасскэ кафедральнэ соборым. Щоджэн нэхъыщхьэм къулыкъур драгъэкIуэкIащ соборым и щоджэнхэм. Пастыр нэхъыщхьэм и гъусэу Тхьэ елъэIуащ къалэм щыпсэухэмрэ зыгъэпсэхупIэм и хьэщIэхэмрэ.
ФокIадэм и 27-м, махуэшхуэм, архиепископ Феофилакт тхьэлъэIу литургие щригъэкIуэкIащ Кисловодск къалэм и Крестовоздвиженскэ члисэм. Щоджэн нэхъыщхьэм къулыкъур драгъэкIуэкIащ епархием и щоджэнхэм Пятигорск епархием Кисловодск щиIэ округым и благочиннэ щоджэн нэхъыжь Знаменский Иоанн я пашэу. Литургие нэужьым Щихънагъым зэгъусэ тхьэлъэIур иригъэкIуэкIащ, махуэшхуэр игъэлъэпIащ, фIэщхъуныгъэ зиIэхэм узэщIыныгъэкIэ захуигъэзащ.
Тхьэм и Анэм и «Скоропослушница» тхьэнапэм и цIэр зезыхьэ чристэн сабий гъэсапIэ Крестовоздвиженскэ члисэм щыIэм щагъэлъэпIащ а IуэхущIапIэр илъэс 15 зэрырикъур. Концерт нэужьым гъэсакIуэхэмрэ я гъэсэнхэмрэ ехъуэхъуащ Пастыр нэхъыщхьэр, сабий садым и унафэщI щоджэн нэхъыжь Лиманов Гермоген.